السلام عليكم

كل سنة وكل الاعضاء بخير النهارده عندنا حوار مع الدكتور سامح بهنسى
وفى البداية بحب اشكر الدكتور سامح انه سمحلى بالفرصة دى وتعاونه معانا
ان شاء الله يعجبكم الحوار وتحاولو تعرفو شخصية الدكتور سامح اكتر
اكيد طبعا احنا كطلبة كلنا مر علينا مده سلاح الشيش فى سنة اولى
والدكتور سامح درسلنا
اسيبكم دلوقتى مع الحوار واتمنى انه يعجبكم



الاسم بالكامل - تاريخ ومحل الميلاد- الحالة الاجتماعية ؟

سامح سعد بهنسى محمد – 16/5/1970 محافظه الدقهليه – متزوج

عدد أبناء حضرتك وأعمارهم ؟

انا عندى محمد 8 سنوات ونوران 5 سنوات

عدد أخوه حضرتك ؟ وترتيبك بينهم ؟

انا لى اخت وحده واخ واحد وانا الثالث

عايز حضرتك تفتكر ايام لما كنت فى الكلية وتحكيلنا عن اجمل زكريات ليك وقتها ؟

انا دخلت الكليه لما كانت لسه تحت الانشاء والذكريات كتير اوى بس كانت اجمل الايام فيها لما كنا فى القسم الداخلى ما الكليه زمان كان فيها قسم داخلى وكان اجبارى على كل الطلبه لازم تبات فى الكليه والاجازه كانت خميس وجمعه فكان فى وقت كبير جدا بنقضيه مع بعضنا انا وزمايلى وهيئه الاشراف على القسم الداخلى وكان فى علاقه قويه جدا بينا وبين كل الطلبه فى الكليه حتى من الدفعات الاكبر منا وطبعا كان كل يوم بيمر علينا كان بيحصل مواقف لما بنفتكرها دلوقتى بنفضل نضحك عليها ولو سالت كتير من الدكاتره فى الكليه عن اجمل زكرياتهم هيقولو ايام ما كنا فى القسم الداخلى

كيف اخترت اختصاصك فى الكلية واوصف لنا مزايا وعيوب هذا التخصص ؟

انا كنت لاعب مبارزه من صغرى وكنت بلعب باسم نادى هيئه قناه السويس ولما دخلت الكليه كان من الطبيعى انى اتخصص فى لعبتى الى اعرفها وزمان كان لازم تختار تخصص اول وتخصص ثانى فكان تخصصى الاول سلاح والثانى هوكى – اما عن مزايا المبارزه فهى زى ما انتو عارفين رياضه عريقه وراقيه جدا ومش صعبه فى تعليمها والتخصص بيعتبر من التخصصات النادره وشعبه المبارزه تعتبر مفيهاش حد زى ما انتو عارفين وده يعتبر ميزه اما عيوبها فانا متحيز شويه ومش شايف فيها عيوب يمكن انتو لو شايفين فيها عيوب تقولولى

ايه هى الانشطة التى اشتركت بها ايام الكلية وحتى الان ؟

اشتركت فى الجواله والاسروفى العروض الرياضيه وبطوله الجامعات طبعا ودلوقتى يمكن مفيش وقت لممارسه انشطه فى الكليه بس بشترك فى بطوله الجامعات بفريق للكليه والجامعه

هل كان لك أصدقاء كثيرين ؟ وهل مازالت تتواصل معهم حتي الان ؟

اكبر نعمه ممكن ربنا يعطيها لحد هى حب الناس والحمد لله انا عندى اصحاب واصدقاء كتير جدا فى مصر وبره مصر بحبهم جدا وهما كمان والحمد لله التواصل موجود بنا

اوصف لنا شعورك فى اول يوم لك فى الكلية وفى يوم تخرجك من الكلية ؟

بصراحه شعورى اول يوم مكنش كويس لانى كنت متخيل انى دخلت الجامعه وكبرت لقيت انى دخلت حياه جديده شبه عسكريه واول واحد استقبلنى فى الكليه كان اخويا وحبيبى الدكتور حمدى محمد على ويومها حسيت ان الدنيا اسودت لما شفت الداخليه والطوابير والاوامر الى ما كنتش بتنتهى واى غلطه ممكن تعملها تتعاقب عليها عقاب شديد جدا لكن الايام بتمر وكونت صداقات وبقت الايام دى احلى ايام حياتى
ويوم التخرج على قد ما كنت فرحان كنت حزين انى خلصت الكليه وهبعد ان اصحابى وكنت خايف من حياتى الى جايه خاص لما تحس انك خلاص لازم تتحمل مسئوليه نفسك وتكون مستقبلك بايدك وان حياتك الى جايه انت الى هتعملها بمجهودك وتعبك

ماذا تقول لكل من هو فاهم طبيعه كلية التربية الرياضية فهما خاطئا ؟

كليه التربيه الرياضيه كليه غير نمطيه ومختلفه عن معظم الكليات لان الدراسه فيها ليها طابع خاص من حيث المواد الدراسيه او طرق التدريس او حتى طريقه تعامل اعضاء هيئه التدريس مع الطلاب ومن الضرورى ان الطالب يتعود على القياده ومهارات التعامل مع الاخرين لان ده اساس عمله بعد التخرج فخريج التربيه الرياضيه ملزم بعد تخرجه بالعمل فى المعسكرات وتنظيم الدورات وقياده مجموعات كبيره من الطلاب وده الى احنا بنحاول نعلمه للطلبه فى الكليه قبل تخرجهم وده بجانب الدراسه طبعا فكليه التربيه الرياضيه عمرها ما كانت كليه العاب وتمرينات رياضيه بالعكس دى بجانب ان بيتم فيها تدريس مواد كتير عن الالعاب الرياضيه وقوانينها وطرق تنظيمها وتعليمها وتدريبها وكمان مواد علم النفس والتشريح والفسيولوجى ومواد علوم الرياضه وكل ده بجانب تكوين شخصيه الطالب القياديه وده الى احنا بنلاقيه لما خريج التربيه الرياضيه بيشتغل فى اى مكان بيفرض نفسه بشخصيته وعمله وقدراته المتعدده الى اكتسبها من خلال دراسته فى الكليه

متى كان تخرج حضرتك ؟ ومتى تم تعيينك كمعيد ؟

تخرجى كان سنه 1994م وتم تعيينى معيد بقسم التدريب الرياضى سنه 1995م

هل انت راض عن مستوى الكليه الحالى وعن سير العمليه التدريسيه فيها ؟ ام تجد انها بحاجه الى المزيد من التعديلات ؟

بصراح انا طبعا غير راضى عن المستوى الحالى للكليه لكن ده راجع لعده اسباب اولها هو احنا اعضاء هيئه التدريس وكمان فى عندنا نقص كبير فى الاجهزه والادوات الرياضيه وده طبعا ليه اثر كبير على العمليه التعليميه لكن ان شاء الله الفتره القادمه هتشهد تطور كبير فى سير العمليه التعليميه خاص ان الكليه دلوقتى موجهه كل طاقتها نحو عمليه التطوير من خلال نظام الجوده وشراء الاجهزه والمعدات وتجهيز المعامل واحنا كل يوم فى تطور كمان فى ظل اللائحه الجديده للكليه اعتقد انه يكون فى تعديلات كتير وان الدراسه هتكون افضل ان شاء الله

هل لك ان تنصحنا كيف يمكن لنا أن نكون رياضين متميزين وناجحين فى المستقبل ؟

اهم شىء انكم لازم تتابعو كل جديد فى مجالكم وتكونو عل اتصال دائم بالاتحاد الرياضى الخاص بلعبتك وطبعا لازم تثقلو نفسكم بدورات تدريبيه بصفه مستمره وهتلاقو كتير من تطور الالعاب على شبكه الانترنت واهم تعديلات القوانين وكمان المباريات وده هيفيد كتير جدا انكم تكونو متمييزين جدا فى مجالكم ولو فى تواصل بينكم وبين المدربين لتبادل الخبرات ده هيكون كويس اوى ويا ريت طبعا لو تقدرو تكملو دراسات عليا فى المجال ده طبعا شىء هيخليكو متميزين جدا

كيف يمكن لخريح تربية رياضية ان يتابع تحصيله العلمى بعد التخرج ويبقى على اطلاع ومعرفة باحدث المواد والاجهزة والدراسات ؟

لازم يتابع الابحاث العلميه فى مجال الرياضه الخاصه به وكمان يكون على اتصال باستاذه فى ماده التخصص لان هيلاقى عنده كل جديد وكمان يتابع الجديد فى مجاله على الانترنت واهم شى من وجهه نظرى ممكن انه يجعله مطلع على كل ما هو جديد هو الدراسه اما عن طريق دراسه علميه من خلال الدراسات العليا او الدراسه من خلال دورات تدريبيه او دراسه حره من خلال اطلاعات الشخص نفسه

هل تحب إنك تكون عميد للكليه مع ذكر السبب فى الحالتين ؟ وايه ممكن تعمله لو توليت هذا المنصب ؟

انا مش بحب المناصب وبدعى ربنا دايما انه يبعدها عنى لانى عندى اعتقاد شخصى ان الكراسى غالبا بتغير النفوس وبتخلى اصدقاء الامس اعداء اليوم والعكس وانا محبش اخسر حد من اصحابى ولا زملائى ولا احب حد يزعل منى ده غير ان منصب العميد بيحتاج عمل ليل ونهار وجهد كبير وانا معتقدشى عندى القدره على كده

تتوقع الكليه هتبقى إزاى بعد عشر سنين يا دكتور ؟ من حيث الطلبه والكليه نفسها والإداره كمان ؟

اعتقد هتكون احسن من النهارده وغالبا هتكون اكتملت كل الملاعب واصبحت قريه اوليمبيه ان شاء الله اما الاداره والطلبه فالله اعلم بعد عشر سنين هيكون مين وكيل ومين عميد وجايز اعداد الطلبه تزيد بس انا متوقع ان فى ظل اداره الجامعه الجديده جامعه بورسعيد ان شاء الله الكليه هيكون مستقبلها افضل باذن الله

مين الشخصيه اللى عجبتك فى تربية رياضية بورسعيد "دكتور ومعيد وطالب" وده خلال سنين تدريسك ؟

هما اكتر من واحد واكثر من شخصيه اثرت فيا اولهم الدكتور عادل عبد البصير والراجل ده عنده علم كبير اوى وكمان عنده قدره على الاداره بشكل ممتاز جدا وفى كمان الدكتور محمود خليفه بجد شخصيه محترمه جدا وكمان بطل فى لعبته ويمكن مش كتير يعرف انه لعب فى الاوليمبيات واخويا وصديقى الدكتور سامح الشبراوى وانا متوقع لسامح انه يكون ليه مستقبل كبير اوى وعلى مستوى الطلبه فى كتير اوى وانا بحب كل طلبتى وكلهم انا معجب بيهم لان مفيش فيهم حد وحش الحمد لله التربيه الرياضيه كلها رجاله وانسات زى الفل علشان ممكن يزعلو منى

ايه راي حضرتك في نظام الجودة في الكلية ؟
وهل حضرتك شايف ان ممكن يكون في منه فائدة ؟ ولو في فائدة ممكن تقدر بنسبة قد ايه ؟

نظام الجوده لسه فى اوله واحنا لسه دخلين فيه قريب وقطعنا فيه شوط كويس وكل اللجان الى زارتنا قالت اننا على اول الطريق ومشيين كويس وان شاء الله نستمر على كده وطبعا لو اطبقت معايير الجوده بشكل صحييح هيكون هناك فائده كبيره وبنسبه 90% ان شاء الله واعتقد ان الكليه بتحاول انها توصل لكده بس الموضوع بياخد وقت مش فيوم وليله هتحسو بده لان المشروع بتاعنا هياخد سنيين فى تنفيذه

هل انشاء جامعة بورسعيد هو فى مصلحه الخريجين الجدد ام لا ؟
خصوصا الكل معتقد ان الكلية ليست معتمده مما يقلل فرص الطلاب فى الحصول على فرص وظيفية ؟

جامعه بورسعيد جامعه وليده واعتقد ان انشاء جامعه مستقله فى بورسعيد فائده كبيره مش للخريج وبس لا لكل من كان يعمل فى فرع جامعه قناه السويس ببورسعيد من اعضاء هيئه التدريس وعاملين وطلاب واعتقد ان كون انشاء الجامعه فى مصلحه الخريج ولا ضده معتقدشى الموضوع يفرق المهم انت خريج ايه وسوق العمل محتاجك ام لا وطبعا لما الكليه هتعتمد ان شاء الله فى مشروع الجوده وبالتالى الجامعه هتعتمد هيكون هو ده الى فى مصلحه الخريج انه يكون خريج جامعه معتمده وده الى جامعه بورسعيد بتسعى ليه من اول يوم وان شاء الله تحققه

هنبعد عن الكلية شوية .. ايه اكتر حاجة بتعجبك فى بورسعيد ولما تحب تخرج بتروح فين ؟

انا بحب بورسعيد كلها ومن عشاقها كمان وكل مكان فيها انا بحبه بس اكتر مكان بحبه جدا هو البحر خاصه وقت غروب الشمس ولما بخرج بروح الكورنيش او بقعد مع اصحابى على اى كافى

الرياضية اللى تفضلها بعد سلاح الشيش وتحب انك تمارسها ؟

بحب كره القدم والسباحه والبلياردو والمصارعه الحره بس للاسف مش بمارس اى حاجه منهم الا يعنى شويه سباحه على شويه بلياردو

هل انت شايف انه مهم جدا التواصل مع اصحابك خارج الكلية او اليوم الدراسى عن طريق النت ؟

اكيد وده موجود فعلا انا دائما مع اصحابى واصدقائى وزملائى فى الكليه وحتى بعض الطلبه على النت بشكل يومى وبينا حوارات ونقاشات فى كافه المجالات وموضوعات تخص الدراسه والكليه وغيرها خاصه ان فى ماده علميه كبيره انا رافعها على النت وكتير من الطلبه بتدخل لتحميلها او الاستفاده منها فى المنهج الدراسى

هل تشغل العائلة جزءاً كبيراً من وقتك وكيف توفق بين عملك وعائلتك ؟ وهل يمكن لك ان تصف لنا كيف هي حياتك العائلية ؟

عائلتى مهمه جدا فى حياتى طبعا وبتشغل كل وقتى خاصه ان اولادى لسه صغيرين ومحتاجين رعايه بصوره مستمره والتوفيق بين العمل والعائله مش صعب اذا الانسان نظم وقته صح وكمان الحمد لله ان ربنا رزقنى بزوجه بتشيل عنى كتير من رعايه الاولاد ومطالبهم ومذكرتهم

انا حياتى العائليه مستقره والحمد لله احنا اسره صغيره متفاهمه ومتحابه وبينا مشوره ونقاش فى كل امورنا والحمد لله الحياه تمر فى هدوء وده فضل من الله

أيه الصفه المهمة أو المبدأ اللى بتعلموا لأولادك وبتحاول دايما إنك ترسخه فيهم ؟ وهل تريد أن يكون أبناءك مثلك فى مجال الرياضة أم تترك لهم حرية الاختيار ؟

انا بحاول اعلم اولادى الاخلاص والصدق والامانه وانهم يحبو بعض ويحبو الناس علشان الناس تحبهم اتمنى انهم يطلعوا حسن منى فى الرياضه ويحققو بطولات اكتر منى بس تاتى الرياح بما لا تشتهى السفن محمد بيحب كره القدم ومصدعنى بالدورى وكاس العالم ولاعبى الكره الدوليين وعارفهم واحد واحد وانا معرفشى ولا واحد منهم ونوران مالهاش فى الرياضه خالص عايزه لعب وعرائس وبس

ما هى اهم المحطات فى حياتك والتى تحب دائما ان تتوقف عندها؟

اولى محطات حياتى هى ممارستى لرياضه المبارزه الى شكلت شخصيتى وعرفتنى بناس كتير وعرفت عن طريقها معنى انك تجتهد وتتعب علشان توصل لشىء انت عايزه وبتتمناه
ومن اهم محطات حياتى هو تعيينى معيد بالكليه لان بعد التعيين اكتشفت ان الصعب بدا لان الدراسه كانت كتير جدا ومجهده وعلشان تحصل على الدكتوراه بتمر بسنين كلها عرق وجهد وتعب بس الحمد لله على كل شىء

لو هتنتخب رئيس مصر القادم هتنتخب مين وليه ؟

ان شاء الله هنتخب الدكتور محمد البرادعى لانى معجب جدا بشخصيته ومؤمن بقدراته وارائه السياسيه وفكره المتطور وحاسس انه وطنى جدا غيور على مصريته ومهتم بحال الشعب المصرى وربنا يولى من يصلح

ماهو نصيب مصر من ميداليات من بطولات سلاح الشيش العالمية فى الاعوام الاخيره ؟ ومن اهم الابطال المصرين؟

احنا نصيبنا من الميدليات محدود الى حد ما لكن عندنا لاعبين ممتازين وابطال عالم ومصر حققت اربع ميدليات زهبيه فى البطوله الافريقيه الاخيره بالمغرب ومن اهم لاعبينا بطل العالم تحت 20 سنه علاء الدين سيد الذى احرز زهبيه بطوله العالم بازربيجان تحت 20 سنه واخر نتائج لمصر كانت فى دوره الالعاب الاوليمبيه بسنغافوره للشباب فى سلاح السيف ناشئات جاءت اللاعبة منة الله ياسر فى المركز الثامن، وفى سلاح السيف ناشئين جاء اللاعب زياد السيسى فى المركز ال 12

الرساله اللى ممكن توجهها لطلابك ؟ أو النصيحه اللى ممكن تحب توصلهالهم ؟

احب اقول لكل طلابى ان يجتهدو ويحولو يحققو احلامهم وان العلم هو السلاح الى ممكن يساعدهم فى طريقهم فى الحياه العالم دلوقتى فى سباق مستمر وسريع والفائز فيه هو الى عنده معرفه اكتر وعلم اكتر فانا بتمنى ان كل طلبتى تطلع اكتر وتدرس اكتر خاصه فى مجال تخصصهم علشان بعد التخرج ان شاء الله يكونو رجال وانسات صالحين مفيدين لمجتمعهم ولوطنهم

وكلمة اخيره تحب توجهها لجميع اعضاء موقع طلبة كلية تربية رياضية اللى بيتابعو حوارك الان ؟

انا بشكر موقع طلبه تربيه رياضيه على اتاحه الفرصه لى انى التقى بكل اعضاء الموقع من خلال هذا الحوار الممتع جدا وبشكر القائمين على الموقع على هذا المجهود الرائع واتمنى لهم دوام التوفيق وبشكر كل من تابع الحوار وانا اسف على الاطاله فى الاجابه وتمنياتى للجميع بالنجاح والتوفيق وكل عام وانتم بخير

د.سامح سعد بهنسى




Physical Education Portsaid In Facebook

عدل سابقا من قبل M.Mahfouz في الإثنين 6 سبتمبر - 3:20 عدل 1 مرات

شكراً علي الحوار الممتع ودكتور سامح كان بيدرسلي
وكان لسة اصغر لكن كنا بنحبة جدا شخصية محترمة
وكان مشرف علينا في الدخلية ودكتور سامح الشبراوي
واشكركم جميعا
السيد البدوي
مدرس اول تربية رياضية

شكرا ياادكتور على الصراحه فى كل شىء خصوصا رايكم السياسى ونتمنا لسيادتك دوام التوفيق

منور المنتدى يا دكتور بإجاباتك
واستمتعنا بالحوار الجميل ده ونشوفك على خير ان شاء الله فالكلية

عتزار
واجب اعتزر لكم انى قلت فى حديثى معكم فى هذالمنتدى انى ادعم البرادعى وانه مهتم بقضايا بلده وانه وطنى غيور فلقد انكشفت حقيقته ولقد انخدعت فيه فهو لا
يسعى الا للفتنه بين المصريين ولا يهتم بمصر او المصريين فانا اكرر اعتزارى
لكم واسحب كلماتى ناحيته وحسبى الله ونعم الوكيل فيه ومن منتداكم اوجه له كلمات جديده


ارحل يا برادعى واترك مصر للمصريين فانت باغى فتنه ادخلك الله فيها يا محرض الشباب على الفتنه فيما بينهم لمصلحتك ومصلحه عملائك الامريكان


وشكرا لكل طلبتى الاعزاء واعتزر لكم مره ثانيه

dr.sameh كتب:

عتزار
واجب اعتزر لكم انى قلت فى حديثى معكم فى هذالمنتدى انى ادعم البرادعى وانه مهتم بقضايا بلده وانه وطنى غيور فلقد انكشفت حقيقته ولقد انخدعت فيه فهو لا
يسعى الا للفتنه بين المصريين ولا يهتم بمصر او المصريين فانا اكرر اعتزارى
لكم واسحب كلماتى ناحيته وحسبى الله ونعم الوكيل فيه ومن منتداكم اوجه له كلمات جديده


ارحل يا برادعى واترك مصر للمصريين فانت باغى فتنه ادخلك الله فيها يا محرض الشباب على الفتنه فيما بينهم لمصلحتك ومصلحه عملائك الامريكان


وشكرا لكل طلبتى الاعزاء واعتزر لكم مره ثانيه

كلنا يا دكتور يا سامح كنا منخدعين فيه
وبجد الايام دى بتثبت لينا كلنا مين اللى بيحب مصر وبيخاف وبيغير عليها
ومين مش بيحبها وعايز تخريب
وان شاء الله لما الامور تهدا مصر هتتغير كتير