موضوع: لقاء مع الدكتور محمد زرمبة من المانيا الأربعاء 7 أبريل - 17:41
النهاردة عندنا لقاء غير عادى مع دكتور كلنا بنحبه بجد الدكتور محمد زرمبة ويعتبر اللقاء ده هو او انترفيو على الموقع ودكتور محمد شخصية لينا الشرف كلنا اننا نجرى معاه الحوار ده ونتعرف على شخصيته اكتر ونطمن عليه فى غربته فى المانيا والحقيقة الدكتور محمد من الشخصيات اللى بتحب التطوير ومستعد يعمل اى حاجة ومن خلال الاسئلة هتتعرفو على كدة اكتر الحقيقة انا استمتعت جدا بالحوار وانا متأكد انكم كمان هتستمتعوا ودلوقتى اسيبكم مع الدكتور محمد
اهداء الى طلاب كلية التربية الرياضية ببورسعيد اتمنى لكم دوام النجاح والتوفيق.
انا حبيت اني اكتب باللغة العامية للسهولة .
1- الاسم بالكامل - تاريخ ومحل الميلاد- الحالة الاجتماعية ؟
الاسم / محمد سيد أحمد زرمبة ، تاريخ الميلاد / 11/11/1982م بورسعيد- حي العرب ، الحالة الاجتماعية / متزوج وأعول
2- حضرتك عندك اولاد واسمائهم ؟
نعم ، ابنتي نور 3 سنوات وابني عمر 21 شهر
3- عدد أخوه حضرتك؟؟ وترتيبك بينهم؟
أخ واحد ، أخي حسام ، خريج كلية التربية النوعية قسم اعلام والثالث على دفعته ، وأنا الأخ الأكبر له .
4- ليه اخترت حضرتك دراسة التربية الرياضية ؟ وهل كانت دى رغبتك من الطفولة ؟؟ ولا هي رغبة والديك؟ ولا مجموع الثانوية العامة؟
أنا من صغري وأنا أحب الرياضة وكنت أمارس اللياقة البدنية في الصف الثالث الثانوي وحصلت على المركز الثاني على الجمهورية في اللياقة البدنية عام 1998 حيث سجلت 128 عدة ضغط و 324 بطن في مبني اتحاد الطلاب بالعجوزة ، بالإضافة إلى حبي للعبة ألعاب القوى واشتراكي بفريق الناشئين جري 800 م تحت 18 سنة بنادي بورفؤاد الرياضي تحت تدريب الكابتن ضياء كامل بطل مصر في الجلة والقرص ، وانت ممكن تستغرب لأن أنا كنت في الثانوي شعبة علمي شامل ومجموع الثانوية العامة بتاعتي 81% والكلية في الوقت دة كان المجموع اللي بتاخدة علمي هو 52 % وكانت مفاجأة لأسرتي في البيت ، علشان انا قلت إني عايز ادخل التربية الرياضية مش التجارة لأني بحبها ، واسرتي كانت رافضة الموضوع دة ويقولولي ( هاتطلع مدرس العاب ! ) بس أنا رحت سحبت الاستمارة في أخر يوم للسحب من مبنى الفرع ورحت أمتحن الاختبارات تاني يوم وعملت كل الاختبارات في يوم واحد لأن دة كان آخر يوم اختبار في الكلية . والحمد لله نجحت في الاختبارات واللي امتحني في العاب القوى الدكتور سيد بسيوني والدكتور محمد القاضي .
هاقولك على موقف جميل يدل على الرغبة في النجاح ، أول يوم خميس في الكلية رحت المكتبة علشان بحث كان طالبه مننا الدكتور احمد الروبي وقابلت هناك الدكتور هاني عبد العزيز( طبعا كان لسة طالب في سنة ثانيه ) وقالي انت جاي المكتبة لية ؟ قلتلة انا بعمل بحث عن السلة ، قاللي المكتبة هي سر النجاح وعلشان كدة انا طلعت التاني على دفعتي ، ولو أنت عايز تنجح في الكلية لازم تشترك في المكتبة وتيجي فيها في اوقات فراغك ، وفعلا سمعت النصيحة ، ومن ساعتها بحب المكتبة اكتر من أي شئ آخر.
5- هل كنت فعال فى مجالات الانشطة الطلابية الجامعية الثقافية والرياضية ؟ عرفنا عن الانشطة دى؟
ههههههههه ، انت ممكن تسألني أيه الانشطة اللي انا ما اشتركتش فيها علشان اعرف اجاوب ، انما السؤال دة صعب لأني اشتركت في كل الانشطة الطلابية خلال الدراسة .
الانشطة الرياضية :
- في العاب القوى :- بطولة الجامعة المركز الاول 4 سنوات في ال 400 متر ، بطولة الجامعة المركز الاول 4 سنوات في ال 400 متر تتابع.
- في كمال الأجسام : سنة تانية ، المركز الثاني على الجامعة .
- في الثلاثي الحديث ( البطل الرياضي ) شاركت في البطولة الاولى لية وانا في سنة تانية ولم تحصل الكلية على مركز ، وشاركت وانا في الفرقة الرابعة وحصلنا على المركز الثاني على مستوى كليات التربية الرياضية والكليات المتخصصة بمصر وكانت لأول مرة في تاريخ الكلية هذا المركز .
- اختراق الضاحية : فريق الكلية وانا في سنة ثالثة ، وحصلنا على المركز الأول على مستوى قطاعات الرياضة ببورسعيد ، وحتى الأن الكأس في مكتب الاستاذ الدكتور وكيل الكلية لشئون التعليم والطلاب .
- اشتركت في اسبوع شباب الجامعات في اسيوط عام 2003 كطالب مثالي على الجامعة وعضو في فرق العاب القوى بالجامعة وكنت الوحيد في الجامعة اللي مشترك في نشاطين مختلفين تماما .
الانشطة الاجتماعية :
- الطالب المثالي على مستوى فرع بورسعيد ، وانا في الفرقة الثالثة .
- الطالب المثالي على مستوى الجامعة ، وانا في الفرقة الرابعة ، ومثلت الجامعة في اسبوع شباب الجامعات وحصلت على المركز الخامس على مستوى الجامعات المصرية وكنت الوحيد منكلية التربية الرياضية ، لأن معظم الجامعات طلابهم المثاليين من كليات الطب والهندسة والصيدلة .
الانشطة الثقافية :
- المركز الثاني على مستوى الجامعة في المسابقة الثقافية ، ولأول مرة في تاريخ الكلية نهزم هندسة صاحبت المركز الأول على مدار 5 سنوات .
- دورات اعداد شباب المستقبل من الفرقة الأولى حتى الرابعة ، وتم تكريمي من الادارة العامة لرعاية الشباب بفرع بورسعيد بعد تخرجي ، كأكثر الطلاب تفاعلاً أيام الدراسة في مجال الأنشطة .
- جائزة أفضل تعليق سياسي على مستوى كليات فرع بورسعيد وانا في الفرقة الثالثة .
الأنشطة الفنية :
- المركز الثاني على مستوى فرع بورسعيد في مسابقة الشعر العامي والزجل ، وانا في الفرقة الرابعة .
- المركز الأول على الكلية في لقاء الأسر ، برضة في الفرقة الرابعة .
- الاشتراك في مهرجان الكليات بلوحة حائط مقدمة من الكلية .
أنشطة الأسر :
- أسست أسرة (سمايل) وأنا في الفرقة الرابعة ، وكانت أول فكرة للتعاون بين أسر كليات الفرع ، فكان هناك فرع للأسرة بنفس الأسم في كلية التجارة والتربية النوعية ، وكنت رئيس هذه الاسرة .
- نظمت حفل افطار جماعي للطلبة في نادي تجديف بورسعيد .
- علاوة على ذلك ، حضرت لقاء السيد رئيس الجمهورية لشباب الجامعات وانا في الفرقة الثالثة ، لأفضل الطلاب في معهد اعداد القادة بحلوان ، وكنت رئيس وفد جامعة قناة السويس ، وتم تكريمي بالمعهد ، وتم تعييني قائد عام المعهد لمدة اسبوع وهي مدة المعهد ، وكان افضل تكريم ليه ، لما حضر السيد الاستاذ الدكتور نائب رئيس الجامعة لشئون التعليم والطلاب وقال : فخر للجامعة أن يكون أحد أبنائها هو قائد المعهد .
كفاية ولا أكمل ......................... هههههههههههه
6- هل كان ليك أصدقاء كتير ؟ وهل لحد دلوقتى متواصل معاهم؟
أنا ليه اصدقاء في كل مكان ، لأني من المحبين للصداقة ، وما بحبش حد يزعل منى ابدا ، حتى هنا في ألمانيا عندي أصدقاء من دول كتير جدا بولندا وألمانيا وروسيا واوكرانيا واسبانيا والبرازيل وكوستاريكا واليونان ومالي والمغرب وتونس ولبنان وسوريا . أنا بحب الصداقة ودائم التواصل مع أصدقائي .
7- اوصف لينا لحظة تخرجك من الكلية وايه شعورك وقتها؟
ياااااااااااااااه ، من أحلى لحظات الحياة أن تجني ثمار ما تعبت من أجلة . بس انا زعلت لأني مش هاشوف زمايل دفعتي تاني لأننا كنا أكثر من أسرة مش طلبة، مقدرش أقولك الترابط اللي كان بين أفراد تخصص الادارة 2002.
8- امتى كان تخرج حضرتك؟ من أى جامعه ؟ وامتى تم تعيينك كمعيد ؟
أنا خريج دفعة 5/ 2003 جامعة قناة السويس طبعا ، واتعينت معيد في 1/2004
انا بحب أدرس لطلاب التخصص ، لأنهم أكثر قدرة على استيعاب المادة العلمية ، بس طلاب سنة تانية مابحبش اكتر في المصطلحات العلمية علشان هما عندهم ضغط مواد كتير . وفي الاخر انا بحب كل طلبة الكلية وبعتبرهم زي اخواتي ، ولحد دلوقتي لو حد احتاج مساعدة أهلاً وسهلاً بيه .
10- هل تم تعيينك كمعيد صدفة ولا مكنش فى بالك الموضوع ولا كان ده من طموحاتك ؟
بعد المقابلة اللي قلتلك عليها بتاعت الدكتور هاني عبد العزيز وهو لسة طالب ، رجعت البيت وقلت لوالدتي : عارفة أنا كنت مع مين النهاردة يا أمي ؟ قالتلي مين ؟ قلتلها انا كنت مع التاني على الكلية السنة اللي فاتت . قاللتلي يارب يا بني أشوفك الأول على طوووول. ومن اليوم دة علقت لوحة على باب حجرتي في البيت مكتوب عليها ( د/ محمد زرمبة ان شاء الله ) والحمد لله تحققت دعوة أمي . فأنا كنت راسم لنفسي طريق من سنة أولى أني لازم اتعين في الكلية .
11- ايه هو تقدير حضرتك فى سنين الكلية الاربعه؟ و ترتيبك على دفعتك؟
انا تقديري في الأربع سنوات هو ممتاز مع مرتبة الشرف ، وترتيبي على الكلية التاني بعد صديقي العزيز الدكتور خالد أبو وردة .وطبعا كنت الاول على التخصص .
12- حضرتك كان تخصصك ايه فى الكلية؟ وليه اخترت التخصص ده بالذات ؟
تخصصي كان الإدارة الرياضية ، بس انا كنت دائما احلم بأن أكون اخصائي لأصابات الملاعب والتأهيل ، وكنت بحب التشريح والفسيولوجي جدا ودرجاتي فيها امتياز. بس وجدت ان قسم الادراة الرياضية كدراسة اكاديمية أفضل خاصة بعد كلامي مع استاذي الدكتور محمد عفيفي وحثة ليه على الالتحاق بالقسم .
13- هل حد فى دفعتك فى الكلية موجود لحد دلوقتى معاك فى الكلية ؟ ولو موجود ممكن تقولنا عليهم؟
طبعا صديقى وحبيبي الدكتور خالد أبو وردة ، دفعتي . وفي طبعا من دفعتي بس هما الان بيعملوا بس دراسات عليا .
14- انا فاكر كويس اوى اخر محاضرة لحضرتك فى الكلية قبل ما تسافر للفرقة الثانية كان ايه شعورك وقتها ؟
يااااااااااااااه ، انا كنت زعلان جدا من ان انا اسافر واسيب الطلبة بتاعتي في نص السنة الدراسية ، بس انا حبيت ان انا اتقابل معاكم من مبدأ أنكم أخوتي ، ويكون اخر تعامل لي في الكلية وسط الطلبة الذين احب دائما ان اكون وسطهم
15- فى محاضرة من المحاضرات دخل الدكتور محمد عفيفى رئيس قسم الادارة وقال لينا انك نموذج متميز واتمنى لو كل الطلبة تكون زى حضرك .. انا راى ان دى شهاده جميله اكيد حضرتك بتعتز بيها ولكن حضرتك شايف مين من المعدين الجدد اللى هيكون ليه مستقبل متميز ؟
انت عارف ان الجملة دي ليها قصة رائعة ، ممكن أقولها ؟
وانا في الفرقة الثانية زي ماكنت بالضبط ، دكتور محمد كان بيدرس لينا مادة الاشراف والادارة، بس هو دخل لنا في التيرم الاول وقال انا دكتور المادة دي بس انا المحاضر بتاعها في التيرم التاني ، وفي الوقت دة كان احداث دورة الالعاب الاوليمبية سيدني 2000 على مشارف البداية ، وقالنا الدكتور محمد ان اللي هايعمل تقرير عن البطولة دي بوعدة بدرجات أعمال سنة جميلة ، وفعلا انا قعدت جمعت من الصحف والمجلات والتقارير الاخبارية والنت عن الدورة الاوليمبية وعملت تقرير يومي عن البطولة ، لاحظ بقول يومي وعملت نتائج البعثة المصرية في نهاية كل يوم اوليمبي وجدول عام بترتيب الميداليات يوميا . وقدمت البحث دة للدكتور محمد عفيفي في بداية التيرم التاني وسميت ( سيدني 2000 عروس الألعاب الاوليمبية ) واتبسط الدكتور محمد بالشعل اللي انا عاملة في 136 صفحة ، يعني رسالة ماجستير صغيرة وانا في سنة تانية.وقدمت نسخة منها للأستاذ الدكتور أحمد الحسيني اللي كان في الوقت دة وكيل الكلية لشئون التعليم والطلاب وفرح جداً وقاللي : أية دة ؟ انت في سنة تانية ؟! انت شكلك عايز تتعين في الكلية . وفعلا . دة سبب مقوله الدكتور محمد عفيفي أبي الروحي في قسم الادارة الرياضية .
وبالنسبة للمعيدين الجدد أنا شايف أن المعظم جيد جدا ومستواه العلمي راقي لأن أحنا في عصر المعلومات ، لأن هناك علاقة بين الطلبة وبين الحاضر ، يعني انا ايام ماكنت طالب كان اماكن الانترنت محدودة جدا في بورسعيد ، واللي يعمل بحث على الجوجل يبقى معلم ، دلوقتي النت في كل مكان ، وابداء الرأي متاح ، وانت دليل على ذلك بانشائك للمنتدى الرائع دة لطلبة الكلية. بجد أنا في رأيي كل من هو على الطريق الجديد هو جيد ، ومن يحدث نفسة باستمرار هو الافضل دائماً .
16- في كل مرحلة من مراحل الحياة من الابتدائية حتي الجامعة وتحضير الماجستير والدكتوراه بيكون فيه اشخاص احنا بنتأثر بيهم وهما بيأثرو كتير علي شخصيتنا ياريت حضرتك تذكر لنا الشخصيات اللي أثرت فيك وفي أي مرحلة من الحياة؟
في نطاق الاسرة تأثرت بخالي جدا لدرجة اني تمنيت ان اصبح مدرس للعلوم زية بالضبط .
وفي نطاق الكلية تأثرت جدا بشخصين ، الأول من قسم الادارة الرياضية وهو الدكتور محمد عبد السلام الذي اعتبرة مثلاً رائعاً للكفاح والاجتهاد ، والشخص الثاني من خارج قسم الادارة الرياضية وهو الدكتور جمال فارس الذي اعتبرة مثالاً للعلم والاخلاق والذوق .
وبشكل عام استاذي الدكتور محمد عفيفي ، الذي سبق الكثيرين بأفكارة الجديدة التي عرفت قيمتها لما وصلت المانيا ، لأن الفكر الاوروبي في البحث العلمي هو التحديث وليس النمطية .
17- كلمنا عن رحلتك الشاقة من ساعه الحصول على البكالوريوس لحد الماجستير واخيراً الدكتوراه؟
يااااااااااااااة ، انت تعبتني قوي يا محمود ، طبعا رحلة البكالوريوس انا قلتهالك ورحلة الماجستير نفس النظام ، اما رحلة الدكتوراة فهي المتعة وكل المتعة . طبعا هاتقولي ازاي ؟
هاقولك ، بعد مناقشة الماجستير وتعييني مدرس مساعد يقسم الادارة الرياضية بالكلية ، وتحديدا في شهر 5/2007 ، كلمنى الدكتور أحمد البطل عن ان في بعثات على النت للحاصلين على الماجستير ، وكان آخر ميعاد للتقديم هو يوم 27/5/2007 وكنا تقريبا يوم 21/5 ، قلتله يا دكتور الوقت مش في صالحي لسة مطلوب حاجات كتير وشهادات وموافقات وانا مش جاهز ، قاللي انا قلتلك وشوف نفسك ، رحت للأستاذ عبدة مشالي رئيس قسم الشئون الثقافية بالفرع وحكيت معاه الموضوع قاللي انت لازم تتطلع البعثة دي والورق المتأخر ممكن انك تاخد ورقة من العميد انك لسة شهادات الماجستير ماطلعتش وتقدمها ، وفعلا اخدت الورقة دي من العميد اللي كان في الوقت دة الدكتور احمد الحسيني ، وسافرت القاهرة علشان اقدم الورق بتاعي في اخر يوم للتقديم ، وقدمت ورقى وانتظرت النتيجة .
في الوقت دة كان لازم ان انا التحق بتأهيلي الدكتوراة بالكلية ، و الا هاتروح عليا سنة وفعلا دخلت واستعديت للامتحان التأهيلي وقبل الامتحان باسبوعين ظهرت نتيجة البعثات بأنني المرشح الاساسي للبعثة نظرا لجودة البحث ودرجاتي في البكالوريوس والماجستير ومواد التخصص ، على فكرة انا كنت أصغر مدرس مساعد مقدم ورق البعثات ، كان في ناس معايا في تخصصات تانية اكبر مني ب 7 و 9 سنين ، وفرحت جدا وكان المفروض اني اسافر امريكا ، بس انا غيرت مسار البعثة لألمانيا لتفوقها في مجال الادارة والتسويق الرياضي ، وعلى الرغم من دة دخلت الامتحان التأهيلي في كلية التربية الرياضية ببورسعيد ونجحت فيه .
وبدأت رحلة الاستعداد للبعثة بالحصول على اللغة الالمانية من معهد جوتة بالقاهرة ونجحت في دورة مدتها 5 شهور قضتها كلها في القاهرة لدراسة اللغة ، وبعد كدة اللغة الانجليزية وحصلت على شهادة التويفل الدولي ثم شهادة الرخصة الدولية للكمبيوتر . وبعد كل دة حصلت على الموافقة من الجامعة الألمانية بالدراسة ، وعلى فكرة الجامعة اللي انا فيها من أفضل جامعات التربية الرياضية وان كانت الافضل في اوربا والعالم .
18- ممكن تشرح لينا رسالة الدكتوراه الخاصة بيك و الماجستير بأسلوب مبسط أو الفكره العامه؟
انا الدكتوراة بتاعتي بتتكلم عن نظام التمويل الرياضي في الاندية الالمانية وكيفية الحصول على افكار جديدة لتطبيقها على الاندية المصرية ، اما الماجستير فناقشت المشكلات التي تواجة التسويق الرياضي في اندية مدن القناة ووضع حلول لها في ظل نظام الادارة المحترفة لمجالات التسويق والاستثمار .
19- دكتور محمد حضرتك دلوقتى موجود فى المانيا علشان الدكتوراه فى رأيك ايه هى مميزات وعيوب المجتمع الالمانى ؟ وايه هى العقبات اللى واجهت حضرتك هنا ؟ وازاى قدرت تتغلب عليها ؟
صعب جدا يا محمود التحدث عن الشعب الألماني بصورة عامة ، لأن منهم الكويس جدا والوحش جدا مفيش حد في النص ( أبيض يا أسود على رأي عادل امام ) بس الاغلبية كويسين جدا ، يكفي الاحترام ، وتقدير العمل حتى وان كان بسيطا .
العقبات اللي واجهتني كانت في اول شهر لية في المانيا وطبعا بالنسبة للغة ، انا كنت بتكلم في الكورس الماني مع مصريين ، انما هنا با تكلم ألماني مع ألمان يعني بنزل اشتري حاجة ، اروح البنك ، اروح الكلية ، مع المشرف بتاعي ، طبعا انا بدأت مع المشرف بالكلام باللغة الانجليزية وبعد اسبوعين بالضبط قاللي نتكلم ألماني ولو غلطت انا هاعدلك الكلام ، والحمد لله المستوى تقدم في اللغة لدرجة ان بتكلم دلوقتي مع المشرف لمدة ساعة ونص بالألماني وبحضر المحاضرات بالألماني . وطبعا دة كلة استغرق وقت وجهد عقلي رهيب لأني بكتب رسالة الدكتوراة بالانجليزى وكل المحاضرات بالألماني والكتب أيضا والمفروض ان افهم كل دة بالعربي .
20- هنا احسن ولا المانيا ؟
من ناحية الاسرة والاصدقاء مصر أفضل ، اما من ناحية العلم والثقافة وحقوق الانسان والاحترام والتقدير والوقت ألمانيا افضل للعديد من الاسباب ، واتمنى لو توافرت لية الفرصة بعد الدكتوراة والعودة لمصر ، أن أعود مرة أخرى لن أتردد.
الف شكر يا محمود ، انا ان شاء الله ممكن أنزل أجازة العام القادم ، بسبعثتي تنتهي ان شاء الله كمان 3 سنوات
22- هل فيه فرق كبير بين الممارسة العملية فى الواقع وبين اللى احنا بنتعلمة فى الكلية؟
طبعا ، الاحتكاك بالعالم الخارجي وبيئة العمل يثري ملكات الفرد ، انا هاديلك مثال شخصي :
انت عارف ان انا اخصائي اصابات الملاعب والتدليك بالفرق الاول لكرة القدم بنادي الرباط سابقا ونادي المريخ قبل سفري ، انا درست في الكلية تشريح وفسيولوجي واصابات وتأهيل واسعاف أولي ، ولكن النظري شئ ، والتطبيق العملي في الملعب شئ آخر ، انا قعدت 6 شهور كاملين اتدرب على ايد اخصائي اصابات ملاعب معاة دبلوم صنايع بس شغال في المجال بقالة 25 سنة وعندة خبرة كبيرة جدا ، بس انا اكاديمي ودكتور جامعة واللي درستة محتاج تطبيق ، قعدت ولاحظت هو بيعمل اية وربطت هذه الخبرة بالدراسة العلمية في الكلية ، وقدرت ان انا اعمل اسم لية في مجال اصابات الملاعب والتأهيل على مستوى بورسعيد ( الحمد لله ).
اذن يجب عليك بعد التخرج ان تحتك بالمجتمع الخارجي كمتعلم ثم تربط بين العلم الذي درستة وبين متطلبات المجتمع
23- هل حقق الدكتور محمد كل احلامه؟ ولا بتؤمن بالاحلام المتجددة ؟ وايه هي أحلامك الان؟
الانسان يعيش ويموت ولا يحقق كل احلامة ، وانما يعيش ليسعى لتحقيق هذه الاحلام ، وانا اتعودت ان تكون احلامي مرحلية ، بمعنى ان لكل مرحلة الحلم الخاص بها ، مرحلة البكالوريوس حلمي كان التعيين في الجامعة ، مرحلة الماجستير حلمي كان ان اكون مدرس مساعد ، والان حلمي ان اعود بالدكتوراة من المانيا بعد توفيق الله سبحانه وتعالى ، واستعد لحلم اخر ان شاء الله تعالى .
24- بتقضى اوقات فراغك ازاى ؟
انا من عشاق القراءة وكتابة الشعر ، وبعد مجيئي لألمانيا ربطت هذه الهواية بالادب الالماني ، بس معظم وقت الفراغ بقضية في صاله الالعاب الرياضية او بالجري .
العاب القوى ، انا بجري 3 ايام اسبوعيا 30 دقيقة ، لأن هنا اهم حاجة في الالمان ركوب الدراجات والجري .
26- هل فيه روتين معين لحضرتك بتمارسه كل يوم؟ ويا ريت تقولنا يومك بيبقى إزاى؟
عادي الصبح بروح الجامعة لو عندي محاضرات ، ولو مفيش بذاكر في البيت وبشتغل في الرسالة بتاعتي ، وبعد الظهر بجرى او بروح الجيم ، بالليل بسهر مع عائلتي ، أو مع اصدقائي المصريين ، والسهر هنا مش زي مصر السهر هنا لحد الساعة 11 وبعد كدة مفيش مواصلات ، البلد بتنام من الساعة 9 ليلا ، وفي بعض ايام الاجازات الالمانية بخرج مع اصدقائي الألمانيين بس بشرب كوكاكولا وهم بيشربوا ........ .
27- بتعمل ايه فى فترة الإجازات يا دكتور محمد؟ وأيه سبيل الترفيه لحضرتك؟
بخرج مع الاسرة ، او بقضي اليوم مع احد اصدقائي المقربين لية واللي كان بيدرس معايه في معهد جوتة بمصر واسمة وئام نبيل وهو مدرس مساعد بكلية الصيدلة جامعة المنصورة وهو ساكن في بلد جنبي ، المسافة بيني وبينها 15 دقيقة بالقطار .
وسبل الترفية هنا كتير جدا ، في التلفريك وحديقة ملاهي ، ساعات بروح هولندا ولكسمبورج ، وربنا يسها انا برتب لرحلة لفرنسا واسبانيا في الصيف .
28- اذكر لنا موقف ضحكت فيه من قلبك؟ وموقف زعلت فيه جدا؟
الموقف اللي انا ضحكت علية من قلبي في مصر ، واحد كان مقدم فية تظلم ازاي اطلع البعثة وانا عندي 26 سنه وهو عندة 32 سنه ومش هيطلع ، الحمد لله جه الرد من الادارة العامة للبعثات بأن الغرض من الحصول على البعثة هو استثمار طاقة الشباب ، والمذكور أصغر منك ب 6 سنين !!!!
الموقف اللي انا ضحكت علية في ألمانيا ، بس على نفسي أول يوم لية في ألمانيا ولقيت الناس كلها بتتكلم بالألماني وواحد سألني الساعة كام ، وكنت عارف الرد بس خايف أقول لأغلط في الجملة فسابني ومشى ، بس الحمد لله دلوقتي انا الي بسأل الألمان في الشارع .
الموقف اللي انا زعلت فية جدا ، في نادي الرباط والانوار ، قعدت أشتغل مع الفريق الأول لمدة 6 شهور بدون أي راتب وبدون أي تقدير ، وتم الاستغناء عني في الموسم الجديد دة زعلني جدا ، بس الحمد لله الموسم اللي بعدة اشتغلت في قطاع الناشئين بالمريخ ، وتم تصعيدي للفريق الأول كأفضل أخصائي اصابات في النادي ، واشتغلت يومها مع الكابتن حسام غويبة في فريق الكرة الخماسي بالحاويات وكانت فاتحة خير علية .الحمد لله على فضل نعمة
29- ايه راي د. محمد في نظام الجودة في الكلية؟ وياترى حنشوف تطوير قريب؟
جيد ، واتمنى ان يخلص الكل في عملهم ( كل أفراد الكلية ) .
30- ايه رأى حضرتك فى الموقع ؟ واذاى اتعرفت عليه ؟ وايه هى مقترحاتك للموقع ونفسك تشوفه عليه ؟ وايه اللى ناقصنا ؟
انا كنت بعمل بحث عن التربية الرياضية ولقيت المنتدى ، فرحت جدا جدا وعملت تسجيل على طول للتواصل معاكم ، والموقع في مجملة جميل واتمنى ان يكون في محاضرات مسجلة ( طبعا بعد أذن دكتور المادة ) للأستفادة ، وممكن لو في واحد كويس يعمل المحاضرات بوربوينت ويرفعها على الموقع يبقى شغل جميل جدا .
اتمنى ان الموقع دة لا ينتهي بنهاية دراستكم وانما تخلوة حلقة دائرة بين اللي خلص الكلية وبين الطلبة الجدد بمعنى ان انت السنة الجاية هاتخلص الكلية ، خللي في حد اصغر منك بسنة او اتنين من الكلية يبقى مسئول معاك عن الموقع وبعد اما تخلص هو اللي يمسك مكانك وهو لما يكبر ويبقى في رابعة يعمل كدة ، وهكذا .....
31- كلمة بتوجهها لكل الطلبة اللى حبو انهم يسألو حضرتك وبعتو الاسئلة علشان يطمنو عليك ؟
وحشتوني جدا جدا
32- ايه النصيحة التي تحب أنك توجهها لطلاب كلية تربية رياضية عموما؟ وطلاب قسم الادارة خصوصا؟
لطلاب الكلية ،
- اتمنى منكم الالتزام بالمحاضرات والحضور المنتظم للاستفادة وليس لدرجات اعمال السنة - حب الكلية كأنها بيتك ، وازعل قوى لما تعرف انك مروح البيت - استثمر هذه الايام في الانشطة الطلابية والرحلات ، فانها اجمل ايام العمر ، وزي مانتا عرفت دلوقتي انا اشتركت في كل حاجة في الكلية ، وطلعت رحلات كتير جدا بس المهم ان دة لا يؤثر على مذاكرتي وتفوقي الدراسي . لأنك لو حققت المعادلة دي هاتكون انسان ناجح في حياتك كلها . - قول رأيك بصراحة وحرية ، ولكن بغلاف من الأدب والاحترام. - لا تكره الكلية حتى لا تكرهك ، لأنها ان كرهتك سيكون مصيرك عربية ميكروباص خط المعاشات او السلام من برة . - استاذك هو أكثر واحد عارف مصلحتك ، فخاف على مصلحتك مثلما هو يحافظ عليها. - اهتم جدا بالمكتبة وحافظ على الكتب .
بالنسبة لطلاب الادارة :
- نفس النصائح السابقة بالاضافة الى الاهتمام بالقراءة في كل ما هو جديد في مجال الادارة مثل التسويق و التمويل والخصخصة والبث التليفزيوني و الادارة المحترفة و العلاقات العامة و الاعلام الرياضي .
- لا تقل انك في قسم الادارة لأنه قسم سهل ، العكس هو الصحيح الادارة الان من اصعب المجالات ، وتذكر ان نجاح النادي الاهلي ناتج من نجاح الادارة المحترفة . على فكرة انا زملكاوي .
الف شكر يا محمود على الوقت الجميل دة والذكريات اللي انت رجعتهالي تاني من زمااااااان ، واتمنى ان يكون اللقاء دة مفيد ليك ولزملائك ، ولي طلب بسيط جدا انا عايز كل اللي يقرأ اللقاء دة يدعيلي بالنجاح ولأبني بالشفاء .
والسلام عليكم ورحمة الله وبركاته محمد زرمبة – كولن ألمانيا 06/04/2010
عدل سابقا من قبل M.Mahfouz في السبت 10 يوليو - 17:50 عدل 1 مرات
موضوع: رد: لقاء مع الدكتور محمد زرمبة من المانيا الأربعاء 7 أبريل - 17:53
الحقيقة انا بشكر الدكتور محمد جدا جدا على الحوار الجميل ده بجد ودى اول مرة يمكن اعمل حوار مع دكتور بس مقدرش انسى كمان صحابى الطلبة اللى ساعدونى على الاسئلة من الموقع هنا وكمان الطلبة اللى حبت تطمن على الدكتور محمد من على الفيس بوك لما عرفو انه هيكون معانا على الموقع بجد شكرا ليكم
وبصراحة كلام حضرتك بحس ان فيه حماس كبير ربنا يوفقك فى حياتك
واحب ارد على حضرتك فى شوية نقاط
اقتباس :
واتمنى ان يكون في محاضرات مسجلة ( طبعا بعد أذن دكتور المادة ) للأستفادة ، وممكن لو في واحد كويس يعمل المحاضرات بوربوينت ويرفعها على الموقع يبقى شغل جميل جدا
دى فكرة كويسه جدا وان شاء الله احاول اعملها انا ومجموعة من الطلبة
اقتباس :
اتمنى ان الموقع دة لا ينتهي بنهاية دراستكم وانما تخلوة حلقة دائرة بين اللي خلص الكلية وبين الطلبة الجدد بمعنى ان انت السنة الجاية هاتخلص الكلية ، خللي في حد اصغر منك بسنة او اتنين من الكلية يبقى مسئول معاك عن الموقع وبعد اما تخلص هو اللي يمسك مكانك وهو لما يكبر ويبقى في رابعة يعمل كدة ، وهكذا .....
ان شاء الله مش هينتهى وهيفضل مكمل على طول طالما فيه مجموعة كويس زى اللى موجودين دلوقتى وطبعا نفسى لو عددنا يكبر كمان اكتر من كدة وكلنا فى الاول وفى الاخر بنفيد بعض وكمان نفسى لو يكون معانا اعضاء اكتر من هيئة التدريس علشان نستفيد منهم اكتر
اما انا دلوقتى لسه فى سنة تانية يا دكتور محمد المفروض اكون فى 3 ولكن حصلت ليا ظروف وبعيد سنة تانية على الترم الاول والحمد لله عديت كدة السنة دى خلاص ومستنى باة سنة تالتة وعلى فكرة الحمد لله جبت تقدير امتياز فى الادارة وان شاء الله هدخل قسم ادارة
وبشكر حضرتك مرة تانية على مشاركتك معانا واتمنى ليك التوفيق فى حياتك
موضوع: رد: لقاء مع الدكتور محمد زرمبة من المانيا الأربعاء 7 أبريل - 18:18
حوار جامد بجد يا محمود وشكرا ليك يا دكتور محمد بجد استمتعنا بالكلام مع حضرتك ويارب دايما من تقدم لتقدم وانش اء الله ابن حضرتك يشفى ويبقى فى احسن حال
موضوع: رد: لقاء مع الدكتور محمد زرمبة من المانيا الأربعاء 7 أبريل - 18:45
بجد د/محمد انت واحد من الناس المحترمه اللى الواحد عرفها فى الكليه بس بصراحه اتحرمنا من حضرتك فى 3 و4 لانى كنت قسم التدريب الرياضى
موضوع: رد: لقاء مع الدكتور محمد زرمبة من المانيا الأربعاء 7 أبريل - 19:28
ألف شكر يا جماعة ، أهم حاجة أنكم تذاكروا كويس وتهتموا بالدراسة ، وعلى مقدار الجهد تكون النتيجة .
موضوع: رد: لقاء مع الدكتور محمد زرمبة من المانيا الأربعاء 7 أبريل - 19:38
موضوع: رد: لقاء مع الدكتور محمد زرمبة من المانيا الأربعاء 7 أبريل - 19:42
بجد لقاء جامد و بتمني لحضرتك التوفيق في دراستك و اتمني ان حضرتك ترجع بالسلامة و ياريتني كنت طالب من طلبة حضرتك و بصراحة كلام حضرتك ممتع و يشجع علي القراءة اكتر و اكتر عشان نتطمن علي حضرتك و عشان نتعرف علي المجتمع اللي حضرتك عايش فيه دلوقتي و انشاء الله ترجع مصر بالسلامة
و انشاء الله مش هتلاقي حضرتك ولا واحد مننا شغال علي ميكروباص ولا حتي توك توك (يا رب)
عدل سابقا من قبل M!do في الجمعة 9 أبريل - 0:09 عدل 3 مرات
موضوع: رد: لقاء مع الدكتور محمد زرمبة من المانيا الأربعاء 7 أبريل - 21:58
والله وحشتنا جدا يادكتور وحضرتك كنت واحد من الناس الى اخت رايهم انى ادخل قسم الاداره وشجعنى جدا وترجعلنا بالسلامه
موضوع: رد: لقاء مع الدكتور محمد زرمبة من المانيا الأربعاء 7 أبريل - 23:27
بجد يادكتور انا اتمنالك كل توفيق ليا طلب واحد عند حضرتك الدعاء للعاملين بالكلية بالبعد عن (الوسطة) وربنا ينجحك
شكرا
موضوع: رد: لقاء مع الدكتور محمد زرمبة من المانيا الخميس 8 أبريل - 1:35
بسم الله الرحمن الرحيم
انا طالب فى الفرقة الرابعة شعبة التدريب الرياضى ومعجب بحضرتك جدا وكان نفسى تدرسلنا اكتر انا حضرت حضرت فى سنة اولى ويارب يارب تتحققلك كل احلامك حضرتك شخص مجتهد (ولكل مجتهد نصيب ) وربنا يشفيلك ابنك وترجعلنا بالسلامة ان شاء الله....
موضوع: قد تمثلون جيل المعرفة فلننهض جميعاً بركب التقدم الأربعاء 12 مايو - 18:17
موضوع: لقاء مع الدكتور محمد زرمبة من المانيا 
الأربعاء 7 أبريل - 17:41
(يا رب) 
