أحمد فؤاد نجم يعبّر عن مطالب ثورة التغيير بقصيدة "ده شعب فقري"
كاتب الموضوع
موضوع: أحمد فؤاد نجم يعبّر عن مطالب ثورة التغيير بقصيدة "ده شعب فقري" الأحد 20 فبراير - 0:37
عبر الشاعر أحمد فؤاد نجم عن مطالب شعب وشباب مصر بالتغيير بعد ثورة 25 يناير، في قصيدة جديدة بعنوان "ده شعب فقري".
جاءت القصيدة بكلمات تجسد الأحداث الجارية في مصر من تظاهرات مناهضة لنظام الرئيس مبارك.
كلمات القصيدة التي انتشرت على أغلب المنتديات والمواقع الإلكترونية، كتبها نجم بالعامية المصرية وبأسلوبه المعتاد، تتضامن مع شباب التغيير الذين خرجوا إلى شوارع مصر منذ قرابة الأسبوعين واحتشدوا في ميدان الثورة.. ميدان الشهداء.. أو ما يعرف بميدان التحرير.
نظرا لأن النعمة فاقت حدّها ولأننا مش قدّها ولأن فعلا إنجازاتك فوق طاقتنا نعدّها ولأننا غرقنا في جمايل مستحيل حنردّها
نستحلفك ……. نسترحمك نستعطفك …… نستكرمك ترحمنا من طلعة جنابك حبتين عايزين نجرب خلقة تانية ولو يومين!
اسمع بقى إحنا زهقنا من النعيم ونفسنا في يومين شقا عايزين نجرب الاضطهاد ونعوم ونغرق في الفساد!
بيني وبينك حضرتك ده شعب فقري مايستحقش جنّتك أنا عارفه شعب ماينفعوش إلا شارون وبلير وبوش عايز يجرب الامتهان ويعيش عميل للأمريكان بيمد "غازه" لإسرائيل ويومين كمان ويمد نيل
أهو يعني نشرب ميه واحدة ندوب في بعض ماء وماء وماء ونفضّ سيرة الانتماء وبلاها نعرة وطنطنة تبقى البلاد "مستوطنة" متسلطنة بالسرطنة إيه اللي خدناه م الكرامة والإباء؟
حبة خطب وكلام… كلام إحنا راهننا على النظام ورضينا بخيار السلام بخيار حنسدّ عين الشمس بيه علشان مايطلعش النهار ويطلع لمين؟
حبة معارضة مغرضين؟ وحسب بيان السلطة شلة مأجورين؟ يا عم فضّك سيرة وارضى بقسمتك دا شعب مش فاهم أكيد يلا اطرده من رحمتك!
وإن كنت غاوي الحكم خليك مطرحك حاغطس واقبّ وأعود بشعب يريّحك راضي وعمره ما يجرحك
أخرس ومايسمعش وأعميلك عينيه مش كل قرش يبصّ فيه مايقولش لأه، وفين، وليه
يضرب ينفّض في السليم وعلى الصراط المستقيم كل اللي يعرف ينطقه عاش الزعيم يحيا الزعيم
أحمد فؤاد نجم يعبّر عن مطالب ثورة التغيير بقصيدة "ده شعب فقري"
موضوع: أحمد فؤاد نجم يعبّر عن مطالب ثورة التغيير بقصيدة "ده شعب فقري" 
الأحد 20 فبراير - 0:37
