موضوع: كيف تفكك مظاهره .. عن تجربه شخصيه السبت 24 ديسمبر - 15:06
بتاريخ : 19 ديسمبر 2011
كيف تفكك مظاهره .. عن تجربه شخصيه .. بقلم د/ أحمد عبد الظهير
.. .. ..
إمبارح.. كنت في موقف لا أحسد عليه .. كنت في جامعة الزقازيق ولقيت مظاهره ثابته "يعني في مكانها " وبما إنني واحد من الثوار من منازلهم وعمري ماشوفت مظاهره غير في التليفزيون .. رحت أتفرج .. والحقيقة عجبني أووي الواد قائد المظاهره عليه قوة صوت ماشاء الله – والحقيقة الحكايه دي عقدتي – ماطولش عليك .... رحت أخلص المشوار وحضرت محاضره وتمام التمام .. حلو كده ؟؟
على ما خلصت ونزلت لقيت المظاهره بقيت متحركه وانضم ليها مجموعه من البنات بإلإضافه لنسخ من جرنان التحرير بتاع إمبارح اللي حاطط مشهد البنت اللي بتتسحل .. أخد حوالي تلت صفحة الجرنان
قلت لما أملى عيني من الأحداث التاريخيه دي اللي الواحد مبيعرفهاش غير من كتاب تاريخ 3 ثانوي مع اني كنت علمي .. يعني أدينا بنشوف التاريخ لايف فجأه لقيت الواد بيهتف "علي وعلي وعلي الصوت واللي بيهتف مش هيموت" ..
مش عارف ايه اللي خلاني – وبشكل تلقائي جدا - أوجه الكلام ليه مباشرة وأنا بيني وبينه حوالي 15 متر وأقوله "فين ياعم أمال اللي بيموتو دول إيه؟؟ ساعه وراجعين تاني!!" أنا قلت كده ازاي مش عارف .. كل اللي اعرفه ان كان رد فعل تلقائي جداااااااا مني
لقيت الواد والمظاهره التفت لي والواد وجه كلامه ليا "علشان كده احنا بنتظاهر وحنفضل نتظاهررر .. لحد ماناخد حق البلد دي" ..
قلت له .. "قلت له أنا عن نفسي اللي حياخدلي حقي انتخبته .. ومفوضتش غيره لشان يا خدلي حقي" .. بعد البق ده لقيت مظهر مهم جدا من مظاهر علم النفس الإجتماعي .. المظاهره بعد ماكانت جمهور واحد وصوت واحد لقيت حنفية الفتي المصري فتحت على أخرها وكل واحد الجدع اللي يركب ودن التني واللي يفسر واللي يشرح واللي يبرر واللي .. واللي .. واللي .. المهم اتقسمت مجموعات مابين ثنائيات وثلاثيات ورباعيات وخماسيات .. قصدي مجموعات من فردين أو 3 أو 4 أو 5 الحوار بيني وبين قائد المظاهره ده كان تلقائي وماأخدش أكتر من 20 ثانية بالظبط
المهم الواد أدرك إن المظاهره حتبوظ .. ما انا وبدون قصد وبالصدفه لعبت على الوتر الحساس عند كل مصري ألا وهو الفتي .. وقلبتها لصراع فكري وتنافس على ركوب الودان .. وده ضد القوانين الطبيعيه للمظاهره اللي هي عباره عن تجمع عددي وعلى فكره التوحد بين جمهور المتظاهرين بيحصل حوالين جمال العبارة اللي بيهتف بيها القائد والموسيقى بتاعتها .. زي بالظبط الله يا سيت أعد .. يعني مش بيحصل حوالين الفكره .. والمفروض متدخلش جمل تساؤليه تدي فرصه للدماغ انها تشتغل .. ده أ .. ب .. مظاهرات يا جماعه
وبدأ الولد يقول هتافات أكثر غنائية وشاعرية علشان تاخد العقل .. وبعده قال النشيد الوطني .. وبعض أتباعه رفعو صور البنت وصور الشيخ الشهيد
كل ده وهو بيبصلي بصه .. بس انا مسيبتوش بصيت له بصه قلت له فيها انا عرفت السر وممكن أقلبهالك مكلمه ببساطه والله مش حتاخد مني وقت .. ماهو مبروم على مبروم .. يعمل إيه ؟؟؟؟؟؟؟؟؟؟؟ ..
بس الحقيقه لما جت عيني في عين قائد المظاهره .. أدركت ان ده مش طالب .. دي مش نظرة طالب .. دي مش عيون طالب .. دي مش ندية طالب .. دي مش مثالية ولا سذاجة طالب .. يعني ممكن أقولك ان الطالب بيقعد 5 سنين بعد التخرج وهو لسه مكونش النظره دي والعيون دي .. والحقيقه أنا خبره في طلاب الجامعه ياتربيه رياضية يا آداب عين شمس
المهم أن انسحبت علشان ألحق قطر اتنين وربع طبعا .. بس بعد ما اطمنت ان الزخم الثوري استعاد حيويته .. وان كان فقد الكثير من المشاهدين .. علشان كان جدول امتحانات نص السنه بيتعلق والشعب كله جرى عليه زي مانتو عارفين كل سنه وانتو طيبين يا جماعه
بس الحقيقه اتبسط جدا اني عرفت ازاي ممكن تفكك مظاهره على فكره ماتحولش تقيم الموضوع من حيث الوطنيه واللاوطنيه والكلام ده .. قيم الموضوع بطريقه علميه أفضل
موضوع: كيف تفكك مظاهره .. عن تجربه شخصيه 
السبت 24 ديسمبر - 15:06
