ابدأ ازاى أقول انها حاجة تضحك ولا تزعل؟ المهم انها حاجة تسلى وخلاص
كلمة السر هى "بنت أو Female " احفظوها عشان هيجى سيرتها كتير.
الولد أقصد male يقضى ساعات طويلة على النت تكلف أهله الشيء الفلانى عشان إيه؟ طبعا مش بيذاكر ولا بيدوره على معلومة تنفعه في الأيام السودة اللى إحنا فيها، دا بيدور على كلمة السر أقصد بنات عشان يكلمهم ويتعرف عليهم وليه؟ هنعرف بعد شوية.
وكذلك كلمة السر أكيد عرفتوها بس الفرق انها بتقضى كل الساعات دى على النت عشان الولاد بيحاولوا يتقربوا منها يعنى مش بتلاقى صعوبة في وجود الولاد، والدليل جرب انك تدخل التشات باسم بنت، مثلا هند أو الدلوعة وشوف سيل النوافذ اللى هتتفتح عليك طبعا من ولاد اشى أمير الحب وأجمل واد و هيثم وماجد واحمد وطب اسكندرية .... صدقنى ما تعدش كل الولاد هيحاولوا يوصفوا فى اسمك الجميل اللى مفيش زيه اللى يدل على الرومانسية والجمال الطاغى والصوت العذب.
وكل واحد بقى يحاول انه يستفذ البنت الى بيكلمها عشان ترد عليه ما هى حرب بقى والشاطر اللى يقدر يجذب كلمة السر ناحيت الويندو بتاعته من بين عشرات الويندو المفتوحة قدامها, حتى لو وصلت انه يشتمها بأقذر الألفاظ.
واتفرج بقى مسلسل الكذب لما يظفر الولد باهتمام كلمة السر هو يقولها أنا شادى أو هادى او اى اسم دلوع كدا وفى طب أو هندسة وساكن في المعادى أو الزمالك وعندى موبايل وشقة وعربية, وجسمى مثالى وعنيا خضرا وشعرى حرير, المهم يرسم نفسه قدامها بأى طريقة "مع انه ممكن يكون اسمه حسبو أو عطية، وشغال سباك أو لسة فى الثانوية الفنية، .."
أما هيا بقي ترد عليه أنا رنا أو رشا، من المهندسين أو إسكندرية، تجارة انجلش عنيا زرقا وشعرى أصفر حرير وجسمى بقى ما تقولش بيقولوا عليا شبه مادونا أو شاكيرا، - "يعنى هو شايفها"-.
أما بقى لو كان واد خنفس كدا يبقى لازم الموضوع يتطور اكتر من كدا , موبايلات بقى, انتى عندك موبايل؟ آه عندى. طب نفسى أسمع صوتك ولو نص دقيقة بليز! ولا تتصلى بيا انتى ؟ خدى نمرتى ……
وإذا كان واد مخلص من الآخر يعنى،والظروف تسمح، لازم نتقابل بقى، نفسي أشوفك نروح السينما ولا الكورنيش, لأ ولا أجيلك الكلية؟ ….. والله أعلم ممكن يحصل إيه بعد كدا.
"الحاجة اللى لاحظتها فى البنات أنهم في اغلب الأحيان تلاقيهم اتنين اتنين قاعدين مع بعض,يمكن عشان يساعدوا بعض في الكتابة بحيث دي لو اتزنقت التانية ترد علطول, وهات يا ضحك مع بعض. ! تسالى."
أما لو حاولت تكلم ولد واسمك مايدلش على انك بنت السؤال الإجبارى الأول اللى هتسأله Male or Female? والباقى يتوقف على الإجابة، عشان كدا طلعت موضة ما بين الولاد أنهم يعملوا مقالب فى بعض متنكرين عاملين نفسهم بنات عشان يضحكوا شوية.
طيب ليه؟
سؤال يطرح نفسه ليه الشباب بنات وولاد بيلجأوا للتشات بدل من الحديث المباشر؟
من وجهة نظري إن معظم التشاتر بيكونوا شباب في سن المراهقة وكل جنس عايز يتعرف على الجنس الآخر والرغبة غير المحكومة بتكون على آخرها، واللى بيزود الرغبة دى عنده اللى بيشوفه الشاب سواء بنت أو ولد كل يوم من أول ما يصحى الصبح, ويفتح البلكونة ويلاقى بنت الجيران لابسة ما خف وشف على الصبح "حرانة" لو كان ولد، أو ابن الجيران اللى واقف فى البلكونة بيستعرض عضلاته قدام السنيورة مرورا بالتليفزيون وتمارين الصباح, والشارع والأتوبيس المليان باللحم البشرى اللى بيخبط فى بعضه, والحرم - أقصد الجامعي- اللى كل واحد فيه سايب محاضراته وشابكله واحدة فى ايده –"أصلها بتسنده عشان ما يتكعبلش-" أو قاعدين على جنب بالساعات "بيشرحلها المحاضرات". وغيره كتيييييير ….
طب والحل؟ لازم يعرف بنات أو تعرف ولاد, "عشان ما يتعقدوش" يبقى ما فيش غير التشات على النت اللى يقدر يقول فيها كل اللى هو عايز يقوله من خير خجل ولا خوف من عقاب أو مشاكل، ويمكن يتطور الموضوع لأكتر من كدا مين عارف يمكن يلاقى حد يحبه …..
ويساعد على كدا وقت الفراغ الكبير اللي عند الشباب سواء كان عاطل أو بيدرس فى كلية زورونى في كل امتحان مرة, وطبعا البيه الأب مشغول مش فاضى وماما هانم مش فاضية تشوف ولادها بيعملوا ايه أصلها عضو في جمعية تحرير المرأة الغلبانة, وعندها مؤتمر في مدغشقر أو في الصين.
طيب وإيه المشكلة من التشات؟:
عادى مش هقولكم إنها بتضيع الوقت والفلوس والمجهود في حاجة تافهة، دي ممكن تضيع مستقبلك وحياتك كلها وهضربلكم مثل واقعى:
واحد أعرفه كان متفوق في دراسته جدا، وسيم وطيب وأخلاقه عالية، لكن واحد من صحابه الله لا يسامحه عرفه طريق النت والتشات, المهم اتعرف على واحدة واتطورت العلاقة وخدوا نمر بعض بس الحقيقة هى اللى سحبته مش هو وبقت تتصل بيه كل ليلة وتقوله أحلى كلام لحد ما تعلق بيها ما بقاش يقدر ينام غير لما يسمع صوتها،فى يوم قالتله عايزه أشوفك المهم اتفقوا يتقابلوا بره في يوم الخميس اللي جاى فضل يعد الأيام من يوم السبت لحد اليوم الموعود, وفى يوم الخميس الصبح لبس وتشيك وركب العربية وفى طريقه لمكان اللقاء لقي حادثة قافلة الطريق فنزل يشوف إيه الحكاية, لقى حادثة مروعة عربيتين خبطوا بعض والجثث مرمية فى كل حتة, فاتصل بحبيته عشان يقولها انه هيتأخر; فاذا بتليفون بيرن فى جيب بنطلون إحدى الضحايا فتحرك بتلقائية وطلع الموبايل وبص فى النمرة فلقيها نمرته، أصابه الذهول وماتت حبيبته قدامه وهى بتبصله عنيهم فى عنين بعض.
بعدها كره الدنيا باللى فيها "وكرهنى أنا شخصياً" وساب كليته وهو في السنة الأخيرة ودلوقتى عنده اكتئاب وكان هينتحر لولا ستر ربنا.
هل ما حدش يعمل تشات ونبعد عنه خالص؟ الاجابة لأ لكن تبقى العملية محكومة بوقت محدد، وبلاش دخول الغرف اللى مش محترمة، وكل واحد يحاول يتكلم فى موضوع مفيد, وبلاش الكدب والرسم اللى ما منوش فايدة, وكل واحد يحاول يشغل وقت فراغه بحاجة بديلة، يلعب رياضة مثلا، وإذا كان لابد من النت يحاول يتعلم حاجة مفيدة أو يشترك في المنتديات وساحات الحوار أفضل.
موضوع: رد: الشباب والتشات ادخل ومتترددش الجمعة 19 فبراير - 21:48
موضوع مهم اوى بس بردوا الحل اللى فى اخر الموضوع ده مش حل اللى هو
لكن تبقى العملية محكومة بوقت محدد، وبلاش دخول الغرف اللى مش محترمة، وكل واحد يحاول يتكلم فى موضوع مفيد, وبلاش الكدب والرسم اللى ما منوش فايدة.
متهيألى مفيش شات محترم دلوقتى !!
مشكله الشات بأة ان الواحد وهو صغير لسه جديد على النت بيباة عايز يتعرف على ناس كتير ويتكلم معاهم مش مشكله باة عنده يقول الصراحة ولا لاه المهم عنده انه يتكلم وخلاص ودايما اى حد جديد على النت بيسأل هو منين اعمل ايميل جديد ؟ ومنين ادخل شات بس الحمد لله ياعنى بالنسبالى اول فتره ادخل فيها النت دى كانت عن طريق قريبى ودخلنى على منتدى هو فيه وسجلت وبدأت اشارك فيه مكنتش لسه اعرف مواضيع الشات دى والكلام دة ولقيت ان المنتدى ده مفيد جدا ان اقرا مواضيع واستفيد منها واتكلم مع ناس اكبر منى وبردوا جت عليا فتره ودخلت الشات ولقيت فعلا الاختلاف بأة بين ده وده وفضلت اضحك اوى على الناس اللى تقعد طول الليل وتتكلم فى كلام فاضى ملهوش اى فايده وحسيت ان كدة الواحد بيضيع وقت فمتهيالى ان الحل للمشكله دى ان الواحد يقعد مع نفسه كدة ويشوف حاجة مفيده يعملها ويستغل وقته كويس فى الوقت اللى هو بيقعد فيه على النت
وثانكس على التوبيك
موضوع: رد: الشباب والتشات ادخل ومتترددش السبت 20 فبراير - 13:08
اولا ميرسى جدا لمرورك ومشاركتك الطيبه والمفيده بس انا عايزه اقولك ان الحل اللى انا عرضته مش حل نهائى لان المشكله دى بتزيد وبتكبر مش بتتحل للاسف بس ده تخفيف لانى عمرى مهقدر امنع شاب لاول مره يدخل نت او شات انه يبعد ويقفل وميكلمش شات ده هيبقى مستحيل وهتعرض لانتقاد شديد بس عن نفسى بجد نفسى الغرف دى تتقفل خالص سواء محترمه او غير محترمه ونفسى بجد اشوف النت كله منتديات محترمه نعبر فيها عن رايننا بصراحه
ياااااااااااااااه بس هنفضل نحلم
بشكرك جدا
موضوع: رد: الشباب والتشات ادخل ومتترددش السبت 20 فبراير - 14:03
ونفسى بجد اشوف النت كله منتديات محترمه نعبر فيها عن رايننا بصراحه
ياريت ده يحصل
ونايس على توبيكك يا هنودة
موضوع: رد: الشباب والتشات ادخل ومتترددش السبت 20 فبراير - 15:27
المنتدى اكيد طبعا افيد بكتير لان بيمر على الواحد مواضيع كتيره وبيستفيد منها وتسلم ايديكى يا هند على التوبيك
موضوع: رد: الشباب والتشات ادخل ومتترددش السبت 20 فبراير - 16:13
ميرسى ياباطاطا على المرور والحلم ممكن يتحقق لو بجد حكمنا عقلنا قبل منحكم قلبنا وعواطفنا وكمان هيحصل لما نرجع لسنة رسولنا ونطبقها
ميرسى ليك محفوظ واكيد المنتدى افيد وانا ملاحظه فى الفتره الاخيره زياده عدد المنتديات الهادفه ربنا يوفقنا للافضل دايما
موضوع: رد: الشباب والتشات ادخل ومتترددش السبت 20 فبراير - 18:00
Seriously you're damn right girland really nice work on dat topic thanks for your writes and keep going cause we will keep reading
موضوع: رد: الشباب والتشات ادخل ومتترددش السبت 20 فبراير - 19:50
بصراحة موضوع أكثر من رائع بس بتكلمى فى مين المهم ان الكل عارف كدة بس هيا بقت ادمان خلاص مش بأيد الواد نايس توبيك
موضوع: رد: الشباب والتشات ادخل ومتترددش الأحد 21 فبراير - 12:39
اكيد عندك حق في كلامك
شكرا هند علي التوبيك الرائع
موضوع: رد: الشباب والتشات ادخل ومتترددش الأحد 21 فبراير - 13:54
ربنا يبعد عنا التشات الحمدالله مليش فى غرف التشات خالص هيا يادوب على قد الناس الى عندى على الايميل بس المشكله بترجع للشخص نفسه هو الى بيسمح لنفسه يكدب وهو الى يقدر يوقفها عن حدها وميرسى هند
موضوع: رد: الشباب والتشات ادخل ومتترددش الأحد 21 فبراير - 17:00
موضوع: رد: الشباب والتشات ادخل ومتترددش الإثنين 22 فبراير - 14:22
ممكن طلب ميدو بعد اذنك ترد على مواضيعى باللغه العربيه لانك بتقرا عربى مش انجلش بليز
ووضح ردك التانى لانى مش فاهماه
موضوع: رد: الشباب والتشات ادخل ومتترددش الثلاثاء 23 فبراير - 13:32
انا اسف [ندعوك للتسجيل في المنتدى أو التعريف بنفسك لمعاينة هذه الصورة] , اللاب حروفه انجليزي بس و اتعودت عليها و بكتب عليها اسرع ... ------------- ردي التاني : "استمري باضافة مواضيع اكتر من المواضيع دي عشان هيا بجد مفيده"